ஸ்ரீரங்கத்தில் ஒரு பூத்தில் 5 வாக்குகள் மட்டுமே பெற்ற திமுக: விசாரணை நடத்த கோரிக்கை

mycitytrichynews

May 7, 2026 - 09:26

0 85

ஸ்ரீரங்கத்தில் ஒரு பூத்தில் 5 வாக்குகள் மட்டுமே பெற்ற திமுக: விசாரணை நடத்த கோரிக்கை

தமிழக சட்டமன்றத் தேர்தலுக்கான வாக்குப்பதிவு கடந்த ஏப்ரல் 23ஆம் தேதி நடைபெற்றது. வாக்கு எண்ணிக்கை நான்காம் தேதி நடைபெற்றது. இந்த தேர்தலில் ஸ்ரீரங்கம் தொகுதியில் ஒரு வாக்குச்சாவடியில் திமுகவுக்கு வெறும் 5 வாக்குகள் மட்டுமே பதிவானது பேசு பொருளாகியுள்ளது. இது குறித்த விபரம் வருமாறு ;

ஸ்ரீரங்கம் சட்டமன்றத் தொகுதியில் திமுக சார்பில் எஸ்.துரைராஜ், அதிமுக சார்பில் ஆர்.மனோகரன், தவெக சார்பில் ரமேஷ் உட்பட 21 வேட்பாளர்கள் போட்டியிட்டனர்.

ஸ்ரீரங்கம் தொகுதியில் மொத்த வாக்காளர்கள் 2,87,027 பேரில், 400-க்கும் மேற்பட்ட வாக்குச்சாவடிகளில் 2,55,293 பேர் வாக்களித்துள்ளனர். இதில், தவெக வேட்பாளர் ரமேஷ் 1,03,235 வாக்குகள் பெற்று வெற்றி பெற்றார். திமுக துரைராஜ் 69,645 வாக்குகளும், அதிமுக மனோகரன் 65,819 வாக்குகளும் பெற்றனர்.

இந்நிலையில், இந்தத் தொகுதியில் வாக்குச்சாவடி வாரியாக கட்சிகள் பெற்ற வாக்குகள் விவரம் வெளியானது.

இதில், ஸ்ரீரங்கம் பெண்கள் பள்ளியில் அமைக்கப்பட்டிருந்த 91-வது வாக்குச்சாவடியில் திமுக வேட்பாளருக்கு 5 வாக்குகள் மட்டுமே கிடைத்துள்ளது தெரியவந்துள்ளது. இது திமுகவினரிடையே கடும் அதிர்ச்சியை ஏற்படுத்திள்ளது. இங்கு அதிமுகவுக்கு 236 வாக்குகளும், தவெகவுக்கு 51 வாக்குகளும் கிடைத்துள்ளன.

இதேபோல, 87-வது வாக்குச் சாவடியில் திமுகவுக்கு 42 வாக்குகளும் 93-வது வாக்குச்சாவடியில் 41 வாக்குகளும் மட்டுமே கிடைத்துள்ளன. இது திமுகவினரிடையே அதிர்ச்சியையும், கோபத்தையும் ஏற்படுத்தியுள்ளது.

இதுகுறித்து திமுக நிர்வாகிகள் தெரிவித்ததாவது; திமுகவில் வாக்குச்சாவடி முகவர்கள், பூத் கமிட்டி உறுப்பினர்கள், இளைஞரணி நிர்வாகி, மகளிரணி நிர்வாகி என ஒவ்வொரு வாக்குச்சாவடிக்கும் தலா 14 பேர் நியமிக்கப்பட்டுள்ளனர்.

ஆனால், திமுகவுக்கு 5 வாக்குகள் மட்டுமே கிடைத்துள்ளது என்பது அதிர்ச்சியளிக்கிறது. கட்சியின் பூத் கமிட்டி நிர்வாகிகளே வாக்களிக்கவில்லையா அல்லது வேறு ஏதும் முறைகேடு நடந்துள்ளதா என்பது குறித்து கட்சி தலைமை விசாரித்து நடவடிக்கை எடுக்க வேண்டும் எனத் தெரிவித்தனர்.