லேட்டாக வந்தாலும் லேட்டஸ்டாக பணியாற்ற உள்ளார் வைத்திலிங்கம் - செங்கிப்பட்டியில் திமுக தலைவர் ஸ்டாலின்

லேட்டாக வந்தாலும் லேட்டஸ்டாக பணியாற்ற உள்ளார் வைத்திலிங்கம் - செங்கிப்பட்டியில் முதல்வர் ஸ்டாலின்

தஞ்சாவூர் மாவட்டம் செங்கிப்பட்டியில் முதலமைச்சர் மு.க.ஸ்டாலின் முன்னிலையில் 10,000 பேர் இன்று திமுகவில் இணைந்தனர். முன்னாள் அமைச்சர் வைத்திலிங்கம் அண்மையில் திமுகவில் இணைந்த நிலையில், அவரது ஆதரவாளர்கள் 10,000 பேர் இன்று திமுகவில் இணைந்துள்ளனர். இந்த நிகழ்வில், லேட்டாக வந்தாலும் லேட்டஸ்டாக பணியாற்றுவார் வைத்திலிங்கம், தேர்தல் பணியாற்ற உறுதியேற்போம் என முதல்வர் ஸடாலின் தெரிவித்துள்ளார். இது குறித்த விபரம் வருமாறு ;

தஞ்சாவூர் மாவட்டம், செங்கிப்பட்டியில் முதல்வரும் திமுக தலைவருமான மு.க.ஸ்டாலின் தலைமையில் நடைபெற்ற மாற்றுக்கட்சியினர் இணைப்பு விழாவில் ஓபிஎஸ் அணியில் இருந்து விலகி திமுகவில் ஐக்கியமான வைத்தியலிங்கத்தின் ஆதரவாளர்கள் பத்தாயிரம் நபர்கள் திமுகவில் இணைந்தனர். கட்சியில் இணைந்தவர்களுக்கு துண்டு அணிவித்து முதல்வர் ஸ்டாலின் வரவேற்றார்.

இதனைத்தொடர்ந்து பேசிய திமுக தலைவர் முக.ஸ்டாலின்; வைத்தியலிங்கம், நான் எதிர்பார்த்தது, எதிர்பார்த்ததை விட தன்னை அதிகமான அளவிற்கு தன்னை இந்த இயக்கத்திற்கு ஒப்படைத்து, இந்த இயக்கத்திற்கு சிறப்பாக பணியாற்றுவார் என்ற நம்பிக்கை எனக்கு மட்டுமல்ல திராவிட முன்னேற்றக் கழகத்தில் உள்ள ஒவ்வொருவருக்கும் வந்திருக்கிறது.

வைத்திலிங்கத்தை பல நேரங்களில் பார்த்ததுண்டு. மறைந்த எம்ஜிஆர் ஜெயலலிதா தலைமையில் வைத்திலிங்கம் பணியாற்றியபோது அவர்களுக்கு விசுவாசமாக இருந்து, சிறப்பாக சுறுசுறுப்பாக எல்லாரையும் கவரும் வகையில் அவர் பணியாற்றிய அந்த காட்சியும் நான் பார்த்ததுண்டு.

எம்ஜிஆர், ஜெயலலிதா மறைவிற்கு பிறகு அதிமுக கட்சி என்பது உடைந்து அது சின்னாபின்னமாகி இருந்த நிலையில் அப்பொழுது அவர் சட்டப்பேரவையில் அமர்ந்த காட்சியையும் பார்த்தது உண்டு. அவர் முகத்தில் ஒரு சோர்வு இருந்து கொண்டே இருக்கும். எதையோ பறி கொடுத்தது போல அமர்ந்திருப்பார்.

ஏதோ வேண்டாவிருப்பாக சில கேள்விகளைக் கேட்பார். இதைப் பல நேரங்களில் பார்த்ததுண்டு. ஆக அது என்ன என்பது இப்போது புரிந்துள்ளது. சுயமரியாதையோட நாம் இருக்க முடியவில்லை, சுயமரியாதையோடு பணியாற்ற முடியவில்லை என்ற ஏக்கம் உள்ளத்தில் இருந்து உள்ளது.

என்ன அவர் லேட் ஆக வந்துள்ளார். லேட்டாக வந்தாலும் லேட்டஸ்டாக பணியாற்ற உள்ளார். அதுதான் நமக்கான மகிழ்ச்சி. தேர்தல் நெருங்கிக் கொண்டிருக்கிறது. அப்படி நெருங்கக்கூடிய தேர்தலில் மிகப்பெரிய வெற்றியை நாம் பெறப்போகிறோம் என்பது யாருக்கும் எள்ளளவு சந்தேகம் இருக்க வேண்டிய அவசியம் இல்லை.

தேர்தல் பணியாற்ற உறுதி ஏற்போம், சபதம் எடுப்போம், மீண்டும் திராவிட மாடல் அரசு உதயமாகி ஏற்கெனவே செய்த சாதனைகளை மிஞ்சக் கூடிய அளவிற்கு மேலும் பல சாதனைகளை உருவாக்கி தருவதற்கு நம்முடைய பணி மும்முரமாக இருக்க வேண்டும். வெல்லும் 200, படைப்போம் வரலாறு, வெல்லுவோம் ஒன்றாக என பேசினார்.

 இந்த இணைப்பு விழாவில் எம்பிகள் கனிமொழி, முரசொலி, அமைச்சர்கள் கே. என். நேரு, அன்பில் மகேஷ் பொய்யாமொழி, கோவி. செழியன் மற்றும் திமுக முக்கிய நிர்வாகிகள் கலந்து கொண்டனர்.

 க.சண்முகவடிவேல்