திருச்சி

துறையூரில் ஆம்புலன்ஸ் தடுத்து நிறுத்தம்; அதிமுகவினருக்கு பொதுமக்கள் கண்டனம்

mycitytrichynewsmycitytrichynews
Aug 25, 2025 - 10:32
 0  7
துறையூரில் ஆம்புலன்ஸ் தடுத்து நிறுத்தம்; அதிமுகவினருக்கு பொதுமக்கள் கண்டனம்

துறையூரில் ஆம்புலன்ஸ் தடுத்து நிறுத்தம்; அதிமுகவினருக்கு பொதுமக்கள் கண்டனம்

 திருச்சி துறையூர் பகுதியில் எடப்பாடி பழனிசாமி பிரச்சாரத்தில் ஈடுபட இருந்தார். முன்னதாக அங்கு குவிந்த அதிமுகவினர் கூட்டத்திற்கு இடையே ஆம்புலன்ஸ் ஒன்று புகுந்தது. அப்போது ஆத்திரம் அடைந்த அதிமுகவினர் ஆம்புலன்சை தாக்கியதால் பரபரப்பு ஏற்பட்டது. திருச்சி மாவட்டம் துறையூர் பகுதியில் அதிமுக பொதுச் செயலாளரும் எதிர்க்கட்சி தலைவருமான எடப்பாடி கே. பழனிசாமி பிரசாரப் பொதுக்கூட்டம் நடத்துவதற்காக வரவிருந்ததால், முன்னதாகவே அதிமுகவினர் பெருமளவில் சாலையோரம் காத்திருந்தனர். அந்த நேரத்தில், ஆத்தூர் சாலையில் விபத்தில் சிக்கிய ஒருவரை மீட்க ஆம்புலன்ஸ் அதிவேகமாக வந்து கொண்டிருந்தது. ஆம்புலன்ஸ் வேகமாக வந்தபோது, கூட்டத்தில் இருந்த சில அதிமுகவினர் சாலையை மறித்து, வாகனத்தை தடுத்து நிறுத்தினர். ஆம்புலன்ஸ் செல்ல வழியளிக்காமல் சில நிமிடங்கள் தடுப்பதால், விபத்தில் காயமடைந்தவரின் உயிர் ஆபத்தில் சிக்கக்கூடும் என்ற அச்சம் ஏற்பட்டது இதற்கிடையில், ஆம்புலன்ஸ் டிரைவர், நோயாளியை உடனடியாக மருத்துவமனைக்கு கொண்டு செல்ல வேண்டிய அவசியத்தை விளக்கினார். ஆனால், அங்கு இருந்த அதிமுகவினர் சிலர் டிரைவருடன் வாக்குவாதத்தில் ஈடுபட்டதாகக் கூறப்படுகிறது. மேலும், டிரைவரை தாக்க முயன்றனர். இதனால் அங்கு கடும் பரபரப்பு நிலவியது. பின்னர், காவல்துறையினர் விரைந்து சம்பவ இடத்திற்கு வந்து நிலைமையை கட்டுக்குள் கொண்டு வந்து ஆம்புலன்ஸ் செல்ல வழிவகை செய்ததன் மூலம், விபத்தில் காயமடைந்தவர் சிகிச்சைக்காக மருத்துவமனைக்கு கொண்டு செல்லப்பட்டார். இந்தச் சம்பவம் குறித்த தகவல் பரவியதும், பொதுமக்கள் மற்றும் சமூக வலைதளங்களில் கடும் விமர்சனங்கள் எழுந்துள்ளன. "உயிர் காப்பாற்ற வேண்டிய ஆம்புலன்ஸையும் தடுத்து நிறுத்தும் அளவுக்கு அரசியல் வெறி மேலோங்கி உள்ளதே" எனக் கண்டனம் தெரிவிக்கப்பட்டு வருகிறது முக்கியமாக, தேர்தல் பிரசாரம் தீவிரமடைந்துள்ள நிலையில், அரசியல் கட்சியினர் மற்றும் ஆதரவாளர்கள் பொது நலனைக் கவனிக்காமல், தங்களது அரசியல் பிரசாரத்தையே முன்னிலைப்படுத்துவதாக குற்றச்சாட்டு எழுந்துள்ளது. சாலையில் ஆம்புலன்ஸ் செல்லும் வழியை தடுக்கக்கூடாது என்பது அடிப்படை விதி. ஆனால், அதை புறக்கணித்ததால் உயிர் காப்பாற்றும் முயற்சியே தாமதமாகியிருப்பதாக பொதுமக்கள் வலியுறுத்துகிறார்கள். மருத்துவத்துறையினர் கூட, "ஆம்புலன்ஸ் எப்போதும் முன்னுரிமை பெற்ற வாகனமாக கருதப்பட வேண்டும். அதை தடுக்க முயற்சிப்பது மட்டுமின்றி, டிரைவரை தாக்க முயல்வது மனிதாபிமானத்துக்கு எதிரானது" என கண்டனம் தெரிவித்துள்ளனர். இந்நிலையில், காவல்துறையினர் சம்பவத்தில் ஈடுபட்டவர்களை அடையாளம் கண்டு விசாரித்து வருகிறார்கள். சம்பவம் தொடர்பாக வழக்குப் பதிவு செய்யப்பட வாய்ப்பு உள்ளதாகவும் தகவல்கள் வெளியாகியுள்ளன. இந்தச் சம்பவம், அரசியல் கட்சியினரின் பிரசார உழைப்புக்கும், பொதுமக்களின் உயிர் பாதுகாப்பிற்குமான சமநிலையை மீண்டும் கேள்விக்குறியாக்கியுள்ளது. தேர்தல் காலங்களில், அரசியல் கட்சிகள் தங்களது பிரசாரத்தை முன்னிலைப்படுத்துவது இயல்பு தான். ஆனால், அவசர மருத்துவ உதவிகளைத் தடுத்து நிறுத்தும் நடவடிக்கைகள் கடுமையாக கண்டிக்கப்படுகின்றன. திருச்சி துறையூரில் நடந்த இந்தச் சம்பவம், "ஆம்புலன்ஸின் அவசர சேவையை மதிக்காமல் அரசியல் வெறியில் நடந்த செயல்" என பொதுமக்கள் கோபம் வெளிப்படுத்தும் நிலையை ஏற்படுத்தியுள்ளது. முன்னதாக எடப்பாடி பழனிசாமி ஒரு பிரசார கூட்டத்தில் பேசும்போது, "நான் தொடர்ந்து பல கூட்டங்களில் கவனித்து வருகிறேன். கூட்டத்துக்கு நடுவில் வேண்டுமென்றே ஆள் இல்லாத ஆம்புலன்ஸ் அனுப்பி இடையூறு செய்து வருகிறார்கள். இப்படியொரு கேவலமான செயலை இந்த அரசாங்கம் செய்து வருகிறது. எத்தனை ஆம்புலன்ஸ் விட்டாலும் எதுவும் செய்ய முடியாது. இனி ஆம்புலன்ஸ் இது குறித்து காவல்துறையிடம் புகார் கொடுப்போம். ஆம்புலன்ஸ் நம்பரை நோட் பண்ணு.. ஆம்புலன்ஸ் டிரைவர் யாருன்னு நோட் பண்ணுங்க என்று தொண்டர்களை நோக்கி பேசியதால், அதிமுகவினர் கூட்டம் நடக்கும் பகுதிகளில் ஆம்புலன்ஸ் வந்தால் தடுத்து நிறுத்தும் சூழல் உருவாகி உள்ளது. இதனால் ஆம்புலன்ஸ் டிரைவர்கள் அதிர்ச்சியில் உள்ளனர் என்பது குறிப்பிடத்தக்கது. க.சண்முகவடிவேல்

What's Your Reaction?

Like Like 0
Dislike Dislike 0
Love Love 0
Funny Funny 0
Angry Angry 0
Sad Sad 0
Wow Wow 0
mycitytrichynews
mycitytrichynews

Related Posts

சீர்காழி அருகே மனைவி, மகன் அடித்துக் கொலை; கணவன் தூக்கிட்டு தற்கொலை

சீர்காழி அருகே மனைவி, மகன் அடித்துக் கொலை; கணவன் தூக்கி...

mycitytrichynews Oct 24, 2026  0  68

இசையமைப்பாளர் தேவாவின் மறைவு ஒட்டுமொத்த தமிழ் சமூகத்திற்கும் பேரிழப்பு - திருச்சியில் திருமாவளவன் 

இசையமைப்பாளர் தேவாவின் மறைவு ஒட்டுமொத்த தமிழ் சமூகத்திற...

mycitytrichynews Oct 17, 2026  0  16

தாராபுரம் இடைத்தேர்தலில் போட்டியிட்ட நாம் தமிழர் கட்சி வேட்பாளர் கோவையில் கைது

தாராபுரம் இடைத்தேர்தலில் போட்டியிட்ட நாம் தமிழர் கட்சி ...

mycitytrichynews Oct 20, 2026  0  57

ஆம்னி பஸ்ஸில் 8 மடங்கு கொள்ளை; ஸ்டிக்கர் ஒட்டத் தெரிந்த அரசுக்கு, கட்டணக் கொள்ளையை தடுக்க தெரியாதா?- கே.என்.நேரு

ஆம்னி பஸ்ஸில் 8 மடங்கு கொள்ளை; ஸ்டிக்கர் ஒட்டத் தெரிந்த...

mycitytrichynews Oct 16, 2026  0  6

அன்பில் மகேஷ் பொய்யாமொழி கைது ; காவல் ஆணையர் அலுவலகத்தில் விசாரணை

அன்பில் மகேஷ் பொய்யாமொழி கைது ; காவல் ஆணையர் அலுவலகத்தி...

mycitytrichynews Oct 26, 2026  0  115

ரூ.4 கோடியில் தயாரான 'விஸ்​டாடோம்’ பெட்டி அக்​.22 முதல் மதுரை - குரு​வாயூர் விரைவு ரயி​லில்: முன்பதிவு துவங்கியது

ரூ.4 கோடியில் தயாரான 'விஸ்​டாடோம்’ பெட்டி அக்​.22 முதல்...

mycitytrichynews Oct 19, 2026  0  42