விடிய விடிய கனமழை; மூன்று மாவட்ட பள்ளிகளுக்கு விடுமுறை

விடிய விடிய கனமழை; மூன்று மாவட்ட பள்ளிகளுக்கு விடுமுறை

தமிழகத்தில் இன்று முதல் வடகிழக்கு பருவமழை தொடங்க உள்ள நேற்று இரவு முதலே தென் மாவட்டங்களில் கனமழை விடிய விடிய பெய்து வருகிறது.இதன் காரணமாக நெல்லை, தூத்துக்குடி, தென்காசி மாவட்டங்களில் பள்ளிகளுக்கு விடுமுறை அறிவிக்கப்பட்டு உள்ளது.

திருநெல்வேலி மாவட்டத்தில் கனமழையினை முன்னிட்டு இன்று அனைத்து வகை பள்ளிகளுக்கும் விடுமுறை அறிவிக்கப்பட்டு உள்ளது. இது தொடர்பாக வெளியிட்டுள்ள அறிவிப்பில், திருநெல்வேலி மாவட்டத்தில் உள்ள பள்ளிகளுக்கு மழையின் காரணமாக இன்று 16.10.2025 ஒரு நாள் மட்டும் விடுமுறை அளித்து மாவட்ட ஆட்சித் தலைவர் மரு இரா.சுகுமார் இ.ஆ.ப அவர்கள் உத்தரவிட்டுள்ளார்கள்.

தென்காசி பள்ளிகளுக்கு விடுமுறை

அதேபோல் கனமழை எச்சரிக்கையை தொடர்ந்து தென்காசி மாவட்டத்திலுள்ள பள்ளிகளுக்கும் இன்று விடுமுறை அறிவிக்கப்பட்டுள்ளது. இது தொடர்பாக வெளியான அறிவிப்பில், தென்காசி மாவட்டத்திற்கு இன்று கன மழைக்கான ஆரஞ்சு அலார்ட் எச்சரிக்கை விடுக்கப்பட்டுள்ள நிலையில், பாதுகாப்பு முன்னெச்சரிக்கை நடவடிக்கையாக தென்காசி மாவட்டத்தில் உள்ள பள்ளிகளுக்கு மட்டும் விடுமுறை வழங்கி தென்காசி மாவட்ட ஆட்சித்தலைவர் கமல் கிஷோர் உத்தரவு வழங்கியுள்ளார்.

தூத்துக்குடி பள்ளிகளுக்கு விடுமுறை

அதேபோல் தூத்துக்குடி மாவடட்த்திலுள்ள பள்ளிகளுக்கு மட்டும் விடுமுறை அறிவிக்கப்பட்டு உள்ளது. ஏற்கனவே வானிலை ஆய்வு மையம் வெளியிட்டுள்ள தகவலின்படி, இன்று தமிழகத்தின் பல்வேறு பகுதிகளில் மழை பெய்யும். தேனி, தென்காசி, திருநெல்வேலி, ராமநாதபுரம் ஆகிய மாவட்டங்களில் ஓரிரு இடங்களில் கனமழை முதல் மிக கனமழை வரை பெய்யக்கூடும் என்று தெரிவிக்கப்பட்டிருந்தது.

மேலும், கன்னியாகுமரி, தூத்துக்குடி, விருதுநகர், மதுரை, சிவகங்கை, திண்டுக்கல், திருப்பூர், கோவை, நீலகிரி, ஈரோடு, கள்ளக்குறிச்சி, விழுப்புரம், செங்கல்பட்டு, காஞ்சிபுரம், சென்னை, திருவள்ளூர், கடலூர், புதுக்கோட்டை ஆகிய மாவட்டங்களிலும் மழை பெய்யும். டெல்டா மாவட்டங்களான தஞ்சாவூர், திருவாரூர், நாகப்பட்டினம், மயிலாடுதுறை ஆகிய பகுதிகளிலும் ஓரிரு இடங்களில் கனமழை எதிர்பார்க்கப்படுகிறது.

புதுச்சேரி மற்றும் காரைக்கால் பகுதிகளிலும் இன்று கனமழை பெய்ய வாய்ப்புள்ளது. இந்த மழை அறிவிப்பு பொதுமக்களுக்கு எச்சரிக்கையாகும்.