மண்ணிலிருந்து விடை பெற்றார் பன்முக வித்தகர் பாக்யராஜ் ;72 குண்டுகள் முழங்க உடல் தகனம்

மண்ணிலிருந்து விடை பெற்றார் பன்முக வித்தகர் பாக்யராஜ் ;72 குண்டுகள் முழங்க உடல் தகனம்

தமிழ் சினிமாவில் இயக்குநர், நடிகர், திரைக்கதை எழுத்தாளர், வசனகர்த்தா, இசையமைப்பாளர் மற்றும் பத்திரிகையாளர் எனப் பன்முகத் திறமையால் ரசிகர்களை, பொதுமக்களை கட்டிப்போட்டவர் கே.பாக்யராஜ் (73).

பாக்யராஜ் என்ற பெயரைச் சொன்னதுமே ஒட்டுமொத்தத் தமிழ் நெஞ்சங்களுக்கும் முதலில் நினைவுக்கு வருவது 'முந்தானை முடிச்சு' படத்தில் வரும் அந்த எவர்கிரீன் முருங்கக்காய் காமெடி தான். வெறும் கமர்சியல் படங்களாக மட்டுமில்லாமல், பெண்களைக் கௌரவிக்கும் வகையிலும், குடும்பப் பாங்கான எதார்த்தமான கதை சொல்லும் முறையாலும் பெண்கள் மத்தியில் நீங்கா இடம் பிடித்தார். இயக்குநர் பாரதிராஜாவின் '16 வயதினிலே' படத்தில் உதவி இயக்குநராகத் தனது திரைப்பயணத்தைத் தொடங்கிய பாக்யராஜ், சுவர் இல்லாத சித்திரங்கள் படத்தின் மூலம் இயக்குநராக அவதாரம் எடுத்தார். அந்தப் படத்தை இன்று பார்த்தால் கூட பார்ப்பவர்களின் மனம் கலங்கிவிடும் அளவிற்குத் திரைக்கதையில் அசாத்திய வித்தை காட்டியவர் அவர்.

இந்நிலையில், நேற்று அதிகாலை வழக்கம்போல எழுந்து தனது தினசரி நடை பயிற்சியை முடித்துவிட்டு வீடு திரும்பியபோது, பாக்யராஜுக்குத் திடீரென கடுமையான நெஞ்சுவலி ஏற்பட்டு மயங்கிச் சரிந்தார். பதறியடித்த குடும்பத்தினர் அவரை உடனடியாகக் கிரீம்ஸ் சாலையில் உள்ள அப்பல்லோ மருத்துவமனைக்குக் கொண்டு சென்றனர். ஆனால், துரதிர்ஷ்டவசமாகச் செல்லும் வழியிலேயே அவரது உயிர் பிரிந்தது. அதன்பின்னர், அவரது உடல் சென்னை நுங்கம்பாக்கத்தில் உள்ள அவரது இல்லத்திற்குக் கொண்டு வரப்பட்டுப் பொதுமக்கள் மற்றும் திரையுலகினரின் அஞ்சலிக்காக வைக்கப்பட்டது.

பாக்யராஜின் மறைவுச் செய்தி கேட்டு அதிர்ச்சி அடைந்த அரசியல் கட்சித் தலைவர்கள் திரை பிரபலங்கள் நண்பர்கள் பொதுமக்கள் என அவரது இல்லம் முன் ஆயிரக்கணக்கானோர் திரண்டனர்.

நுங்கம்பாக்கம் இல்லத்திற்கு திமுக தலைவர் மு க ஸ்டாலின் முதல் ஆளாக வந்து பாக்யராஜ் உடலுக்கு அஞ்சலி செலுத்தினார். இதைத்தொடர்ந்து தமிழக முதல்வர் சி.ஜோசப் விஜய் மலர்வளையம் வைத்து அஞ்சலி செலுத்தினார். அவரைத் தொடர்ந்து நடிகர்கள் பாண்டியராஜன், பார்த்திபன், ரஜினிகாந்த், கமல்ஹாசன், , நாசர், விஷால், ராதிகா, சரத்குமார் என ஒட்டுமொத்தத் தென்னிந்தியத் திரைத்துறையினரும் நேரில் வந்து கண்ணீர் மல்க அஞ்சலி செலுத்தி, குடும்பத்தினருக்கு ஆறுதல் கூறினர்.

இன்று காலை, நுங்கம்பாக்கத்தில் இருந்து பாக்யராஜின் உடல் மலர்களால் அலங்கரிக்கப்பட்ட ராணுவ வாகனத்தில் ஏற்றப்பட்டு இறுதி ஊர்வலம் தொடங்கியது. சாலையின் இருபுறமும் திரண்டிருந்த ஆயிரக்கணக்கான ரசிகர்கள், திரைக்கதை மன்னன் அமரர்... எங்களின் அண்ணன் அமரர்... என்று கண்ணீர் மல்க முழக்கமிட்டு மலர் தூவி விடை கொடுத்தனர். இறுதி ஊர்வலம் சென்னை பெசன்ட் நகர் மின் மயானத்தை வந்தடைந்தது. அங்குத் தமிழ்நாடு அரசின் சார்பில் அமைச்சர்கள் ஆனந்த் மற்றும் ராஜ்மோகன் ஆகியோர் பாக்யராஜின் உடலுக்கு இறுதி மலர் வளையம் வைத்துத் தங்களது மரியாதையைச் செலுத்தினர்.

இதனைத் தொடர்ந்து, தமிழக காவல்துறை சார்பில் 72 குண்டுகள் முழங்க, இரண்டு நிமிட மௌன அஞ்சலியுடன் முழு அரசு மரியாதை அளிக்கப்பட்டது. இறுதியாக, பாக்யராஜின் உடலுக்கு அவரது மகன் சாந்தனு பாக்யராஜ் கண்ணீர் மல்கக் கடைசிச் சடங்குகளைச் செய்ய, 'திரைக்கதை மன்னனின்' உடல் மின் மயானத்தில் தகனம் செய்யப்பட்டது. ஒரே மாதத்தில் தென்னிந்திய திரை உலகில் ஜாம்பவான்களாக திகழ்ந்த குருவும் சிஷ்யனும் மறைந்தது தென்னிந்திய திரையுலகில் பேரதிர்ச்சியை ஏற்படுத்தியது என்பது குறிப்பிடத்தக்கது.